سالار ييكيلماز
سالار ييكيلماز
آنا یارپاق              ایلگی              ایمیل              RSS              ATOM

 بين الخلق آنا ديلي حاقلارينين 10جو ماده سي نين بيرينجي بندينده قيد اولور كي؛

"تامام ديل توپلوم لاري برابر حاققا ماليك ديرلر"

15 جي ماده ده بئله قيد اولونور كي؛

"ديل توپلوملارينين هاميسي اؤز يئرلرينده (آتا بابا ديلين) رسمي بير ديل كيمي ايستفاده ائله مه حاقينا ماليك ديرلر."
24نجو ماده ده بئله يازيلير؛      

"تامام ديل توپلوملاري اؤز ديللرينين توپلومدا گئنيش حضورو اوچون، او جمله دن، تحصيل ديلي كيمي، علاقه لر، ارتباط لار ديل كيمي تمام سويه لرده (مكتب و مدرسه لرده، فني مركزلرده و يونيورسيته لرده و حتي ياشليلارين تحصيل آلماسيندا) قرار وئرمه حاققينا ماليك ديرلر."
 

29جو ماده نين، بيرنجي بند ينده قيد اولور كي؛

"هر كس، ياشاديغي وطنين ده، اؤز  آنا ديلينده مكتبه گئديب تحصيل آلما حاقينا ماليك دير"

30جظو ماده ده بئله قيد اولور كي؛

"تامام ديللر، توپلوم لارينين، ديل و مدنيتي، علم و آراشديرما مركزلرينده بير موضوع كيمي مطالعه اولونوب، آراشديريلماليديرلار."

32جي ماده نين 2نجي بندينده بئله قيد اولونور؛

"هر بير ديل توپلومو، يئرلي و تاريخي آدلاري اولدوغو كيمي ثبت ائديب، قوروما حاقينا ماليك ديرلر..."

33جو ماده ده بئله قيد اولونور؛
"هر بير ديل توپلوموندا، اونلارين اؤز ديللرينده ايستفاده اولونان آد حاقينا مالكيديرلر." 

حال بو كي، ايراندا، بير ديل دن، فارس ديليندن، سونرا باشقا ديلر، و او جمله دن تورك ديلي هئچ بير حاققا ماليك دئيل. تورك ديلي نه رسميته تانينب، نه اونون انكشافينا ديل و مدني عرصه لرده بير ايش گؤرولور. نه اوشاق آنا ديلينده تحصيل آلير. نه ده تورك ديلي بير آراشديرما موضوعسو كيمي آراشديريلير. بو سيختني لارا باخميياراق، تورك ديلي ايران دا بيگانه و حتي جراتله دئمك اولار كي تورك ديلي، حاكيم آپارتايدين طرفيندن، دشمن ديل كيمي تقديم اولونور. ايران دا، تورك ديلينده 30 ميليون اينسان دانيشيرسادا، او ديلده حتي بير مكتب و مدرسه يوخدور. آذربايجانين ئئرلي آدلاري، دئيشيب فارسلاشديريرلار، او جمله دن باخين، آخما قاياني، فارس جا "احمقييه" آدلانديريبلار. دئمك اورا آنلامازلارين محله سي دير!! اورميه ني  (رضائيه)، قوشاچايي (مياندوآب) و ساوجا بولاغي (مهاباد) آدلانديريرلار...! بئله ليكله بين الخلق آنا ديل حاقلاري هر گون و هر ساعات ايران دا آياق آلتينا قويولور و آذربايجان خالقي داواملي و گوندليك اريتيلمه سياستي نه معروض قالير.

داريوش عاشوري تانينميش بير فارس يازيچي و آراشديريجي سي، ايران دا آنا ديلينده تحصيل آلينماماسي حاقدا دئير كي؛ "غيرفارس لارين آنا ديلينده تحصيل آلماسي ايراندا، قانونون اولماسيندان يوخ، بلكه بئله بير ايستين باشقا مليت لر آراسيندا اولماماسيندان قايناقلانير. آنا ديلينده تحصيل آلما حاقي يالنيز غيرفارس ميليتلرين بعضي آكتيولرستلرينين مسئله سي دير".  داريوش عاشوري دئير كي؛ "بو ايستك كوتله نين آراسيندا يايلماييب و حتي كوتله لر بئله بير ايستكي نه لازيم گؤرولر و نه ضروري!" بو دا بير فارس آراشديريجي سينين سالخاق فيكري دير.

بنگلادش، ايران و اوخشارلار

بيلديگينيزكيمي، بوگونكو آذربايجانين ملي دمكراتيك حركاتينا نئچه يؤوندن باخماق اولار، تاريخي يؤندن آذربايجانين يئنيلمه سي، سياسي يؤندن آذربايجانين ضعيف دورومو، اينساني يؤندن آذربايجانليلارين تحقييره معروض قالمالاري، مدنيت يؤنوندن آذربايجانلي نين مدنيتين محونه چاليشمالار و آذربايجانلي نين آنا ديل مسئله سينه گلديكده، اونون ديلي قاداغان اولموش، بيگانه سايلميش، يالقيزقالميش و تورك ديلي ظولمت چؤلونده مظلوم بوراخيلميشدير.  

من بيرآز بنگلادش ده آنا ديلي حاقيندا گئدن حركاتا باخمشام و او حركاتين آذربايجان خالقينين آنا ديللي حاققيندا مبارزه سينده چوخ ياخين اوخشارلارا و ياخينليقلارراس گلميشم.

پاكستان دولتي نين 1947نجي ايلده تشكيلندن سونرا، پاكستانين بيرليگي يالنيز مسلمانچيليق اساسيندا قورولدي و بوچوخ نفوسلو اؤلكه ايكي بويوك ايالت دن، يعني غرب ايالتيندن كي اردو ديلي چوخلوقدادير و شرقي ايالت دن كي بنگال ديلي چوخلوقدا ايدي، تشكيل اولوندو. بيلمه ليك كي اردو ديلي نده دانيشانلارين سايي بنگال ديلنده دانيشانلاردان عموميتله آز ايدي. بو وضعيته باخمياراق، ايسلام ديني باشدا، اردو ديلي دولت طرفيندن پاكستانين تكجه رسمي ديلي اعلان اولوندو. شرقي ايالت ده بنگال ديللي لر پاكستان دولتينين بو حركتيه جيدي عكس العمل گؤسترديلر. اويرنجي حركاتي بو مبارزه نين قاباغيندا گئديردي. بنگال آيدينلاري بيليرديلر كي بو سياست بنگالين نئچه مين ايلليك تاريخين، مدنيتين و ديلين محو ائتمك آماجي ايله قويولوبدور. بنگاللارين پروتست حركاتي پاكستان دوليتن سكوتون سينديرب، بنگال لارين پروتست لريني سينديرماق ايستدي. بو چاتيشمالارين نتيجه سينده بير نئجه بنگالي اؤلدورولدي و فوريه نين 21ي بنگاللي لار طرفيندن آنا ديللي شهيد گونو آدلاندي. و بو حركاتين سونوجو بنگلادشي پارلمان سئچيملرينده استقلال ايستيين پارتيالارا ساري آپاردي. و آنا ديللي حاقيندا گئدن گئنش مبارزه بنگلادش ين استقلال ايله 1971ده سونا چاتدي.

پاكستانين ايستقلالي دان 1947ده، و سونرا بنگالارين آنا ديلي حاقيندا مباريزه سيندن و سونرا بنگلادشين استقلالينا دك 1971جي ايلده، 24 ايل زمان سوردو.

ايرانين گئچن هشتاد ايلده كي حاديثه لري، بنگلادش ده گئدن حركاتي ايله چوخلو اوخشارلار وار؛

ايران دا، مشروطه اينقلابي او اؤلكه يه عدالت خانا و آزادليق گتيرمك ايستيردي. اما رضا پهلوي نين كودوتاسي 1299 دا و تورك ديلينين دانيلماسي ايران دا، 1321 نجي ايلده، يعني 25 ايلدن سونرا آذربايجانين ملي حكومتين، پيشه وري باشليغي آلتيندا ياراتماسينا سبب اولدو. ملي حكومت استقلاليت ايستميردي، چون كي هم مشروطيت ين اساس لاري و هم ده گئچن مين ايلده ايران دا اولان تورك حاكميتلري استقلاليت فيكرين كؤلگه يه آپاريردي.  

پاكستان لا قياس دا، فارس ديلي ايراندا هئچ زامان چوخونلوق ديلي آلماييب. و اونون يانيندا تورك ديلي، البته كه چوخونلوقدا اولماسادا، اما تورك ديلنده دانيشانلارين سايي فارس ديلينده قات قات چوخ اولموشدور. آذربايجان خالقي 1321جي ايلده، اؤز حاكميتين ياراتماسي ايله، اؤز حاقينا كه آنا ديلينين رسمي اولماسي ايدي يئتيشدي. بو حركت بين الخلق شرايطين قربانليغي اولدو و سونرا دا چوخلي دليل لره گؤره يئنيلدي.

 آذربايجان خالقي اؤز مباريزه سينه آنا ديلي حاقيندا، درين تجربه لر و آغير شرايط  اساسيندا دوام ائدي. شرايط تمامي ايله دئيشميش دير. پهلوي لر، گئنيش بير اينقلاب دان سونرا، يئرلرين اسلام جمهوريتينه وئريب. دين اساسيندا قورولان اما مسئله سي يالنيز دين يوخ، بلكه دين و ديل اوستونلوگو اولان بير حاكميت قورولوب. گئنه ده فارس ديلي تكجه رسمي ديل دير. ايندي البته كي فارس حاكميتي فارس ديلينه اوزون زامان حاكميتيندن سونرا بير اؤزل استاتوس قازانديرب. تورك ديلي و اونو اؤزلرينه آنا ديلي بيلن لر اورك ياراسي ايله ياشايرلار. 1357نجي (1979) ايلين سونوندا، اسلام جمهوريتي يارانير، 1358 نجي ايلده خلق مسلمان حزبي توركلوك و يا تورك ديلينه داياناراق يوخ، بلكه توركلري بير آرايا توپلاماق اوچون ميدانا گلير. امما قيسسا زامان دا يئنيلير.  12 ايل اسلام جمهوروسونون قارانليق حياتيندان گئچندن سونرا، آذربايجان جمهوريتي 1991نجي ايلده سوئيت بيرليگيندن اؤز ايستقلاليتين آلدي. بو حاديثه گونئي ده، آذربايجانلي جوان و اويرنجي لرينين اورگينه، بير ايشيق ساچدي. آنا ديلي حاقي گئنه ده آذربايجان اوغول و قيزينين اورگين تيترتدي. چون كو بو اورك دولو قاندي.

آنا ديلي، آذربايجان خالقينا، مبارزه نين ايچ اوزه يي اولاراق، او خالقين ملي دمكراتيك حركاتينا تازا بير حيات و استراتژي سينه تازا بير نفس وئرير. او باشلانقيجدان اينده قدر 17 ايل كئچير. آذربايجانين ملي دمكراتيك حركاتي بو 17 ايلده، آنا ديليني اساس گوتورره ر ك، بابك قالاسينين قورولتايين ياراديب، آذربايجان دامغاسين ايچري ده و خارجده بين الخلق عمومي افكارا ووروبدور. بابك قالاسينين حركاتي يالنيز بير باشلانقيج ايدي. چون كي او حركتين نتيجه سينده ايدي كي، 1385 ايلين خرداد آيندا ملي قيام ، ايران درگي سينيده يايلان كاريكاتورا گؤره ميدانا چيخدي. و تبريز، اروميه، اردبيل، زنجان، مرند، مراغا و آذربايجانين تامام شهر و كندلري بيربيرينه باغلاندي و اوجا سس ايله باغيردي، "تورك ديلينده مدرسه، اولمالي دير هركسه".

آذربايجانين استراتژي مسئله لري و دنيا آنا ديلي گونو

ايندي ايسه، آذربايجانين ملي دمكراتيك حركاتينين دنيا آنا ديلي گونو ايله علاقه لرين، رابيطه لرين، گؤزدن گئچيريب، بعضي نتيجه لري آلاندان سونرا، سؤزومو سونا چاتديريرام.

بوگون آذربايجانين ملي دمكراتيك حركاتي نين اساس پروبلمي، بو حركتين اؤز ميلتيميزين آراسيندا يايلماسي ، و باشقا ميلتلر و دولت لره بو حركاتين اساس سؤزون يئترمك دير. آذربايجانين ملي دمكراتيك فيكري ميلتيميزين ايچينده يايلماسي و يا او حركتين سؤزون باشقا ميلتلره و باشقا دولت لره چاتديرماغا شرايط ايله موناسيب و بوگونكو مدني ديل ايله ايقون اولمالي دير. يعني تبليغي مئتودلار، بعضا حتي سؤزون اؤزوندن ده اهميتلي دير. آذربايجانين ملي دمكراتيك حركاتي نين تبليغي و يايما متدولاري، حسيات دان، هيجان دان، سرتليك دن، خشونت دن و حتي ايدآليسم دن اوزاخ گزملي دير و بو شيوه لرين قاباغيندا عقلانيته، ساكين هامونيه، صلح سئور و سيويل يوللارا و رئاليستي مئتودلارا داياناراق اؤزونه تبليغي بير استراتژي سئچملي دير.

بوگون آذربايجانين ملي دمكراتيك حركاتيندا ايكي تبليغي متد ايشلنير؛

بيرنجي سي؛ ميلتچيلييه اساس لاناراق، آذربايجانين ملي دمكراتيك حركاتي ني تبليغ اتمك

ايكينجي سي؛ اينسان حاقلارينا واؤزليك له "دنيا آنا ديلي حاقلارينا" اساسلاناراق حركاتي تبليغ ائتمك دير.

ديقتينيز چكيرم كي، من بورادا يالنيز تبليغي و يايين مئتودلار حاقيندا دانيشيريق، نه باشقا موضودا.

ايندي ايسه، اؤرنك اولاراق، بير سوآلي جواب لادندمالييق. اودا بو كي؛

حقيقتاً تورك ميلتينين و آذربايجان خالقينين ايراندا بوگون اساس سؤزو نه دير؟

بو سوآلا يوخاري داكي ايكي مئتود اساسيندا ايكي جواب ورمك اولار؛

بيرينجي جواب بيرنجي مئتود اساسيندا، بودور كي؛ آذربايجانين اساس سوزو، آذربايجانين سياسي حاققا ماليك اولماسي و اؤز مقدراتين اؤز الي ايله تعيين ائدمسي دير.

ايكينجي جواب همن سوآلا، ايكنيجي مئتود اساسيندا بودور كي؛ آذربايجان خالقي تورك  ديلينين رسمي اولماسي و آنا ديلينده تحصيل آلما حاقينا ماليك اولماسي دير؟

البته كي بو هر ايكي جواب، يالنيش جواب دئيل دير. چون كي هم آذربايجان اؤز مقدراتيني تعيين ائمك حاقينا و هم ده آنا ديلينده تحصيل آلما حاقينا ماليك اولمالي دير. و بو ايكي جاواب بير بيرينين قارشي سيندا دورمور. اما هر بير سوآلي جاوالانديرماق معين زامان دا، معين يئرده، معين آدامين اوستونده فرقلي اثرلر قويار. بو اثرين (ائتگي نين) نتيجه سي، بعضا مثبت و بعضا ده چوخ منفي اولابيلر. من اثرلي مئتود نه دير دئيه سؤزموزو دوام ائدمك ايسترم.

 سوآل بودور كي؛ عجبا اگر بيزه همان بيرنجي سوآلي، يعني آذربايجانين اساس سؤزو نه دير، وئرسه لر هانكي جاوابي او سوآلين قاباغيندا وئرملييك؟ بيرنجي جوابي؟ و يا ايكينجي جاوابي؟ بعضي لرينه بلكه بو سوآلا جواب وئرمه چوخ ساده و راحت نظره گلسين. آمما منجه او اساس سوآلا جاواب وئرمه دن قاباخ بير باشقا مسئله يه ده دوشونملي يك. و اودا بودور كي، سوآلي وئرن كيم دير؟! او بو دمكدير كي، سوآلي وئرن، بير جور، جاواب نئجه ليگين تعيين ائدير. بير آذربايجانلي بو سورونو سورسا، نئجه جوابلانديرمالييق، بير غير تورك بوسورونو سورسا هانكي جاوابي اونا وئرملييك!

منجه آذربايجانلي لاري و ايران دا ياشايان توركلرين هاميسين بير ترازييا قويماق اولماز. ميلتچي بير آذربايجانلي ايله، آسيميله اولونموش بير آذربايجانلي يا بير مئتودلا آذربايجان مسئله سين تبليغ ائله مك اولماز. چون بير آذربايجانچي آذربايجانلي، ميلتچي تبليغي شيوه ايله تانيش و اونا ميلتچيليك چرچوالادا تبليغ ائتمك ايقون و مناسيبدير. آما بير آسيميله و يا ياريمچيليق آسيميله اولونموش آذربايجانلييا، نه يالنيز مليتچيليك مئتود ايله و نه ده يالنيز آنا ديلي حاقلاري مئتودو ايله اثز قويماق اولماز. بو شرايط ده، آذربايجان مسئله سي ايله تانيش آولمايان آذربايجانلي لار، تركيبي بير مئتودلا تبليغ ائتمك لازيمدير. يعني هم ميلت چيليك و هم ده اينسان حاقلاري و علي الخصوص بين الخلق آنا ديلي حاقلاري چرچواسيندا تبليغ ائتمك لازيمدير. تاسفله بير چوخلو آذربايجان آكتيويستي، بوگون، نيفرت، هيجان و شدت اساسيندا اولان تبليغ شيوه لردن ايستفاده ائديرلر. گينه ده تاسفلر اولسون كي بئلنچي شيوه لره دايانماق هر زامان آذربايجان خالقينا ضررلي شيوه لر اولموشلار.

آما غير تورك ميلتلره گلديكده، ايراندا كي غيرفارس مليتلرين اكتويستلري ايله، ياخين  ديل و آماج لاريميز اوچون ميلتچيليك اساسيندا دانيشمالييق. اما فارس ميلتي ايله، او ميلتين فارس آپارتايد سيستمي نين تاثير آلتيندا اولماق اوچون، اينسان حاقلاري، و اؤزليكله آنا ديلي حاقلارين تبليغ (يايين) مئتودوموزدا اساس گؤتورملييك.

منيم فيكيرم جه، بوگونكو شرايطه گؤره و اينسان حاقلاري نين گئنيش آغيرليغي اوچون، ايران دان خارج ده، تبليغي مئتودلاراينسان حاقلاري و اؤزليكله "بين الخلق آنا ديل حاقلار" اساسيندا اولمالي دير.

"بين الخلق آنا ديلي گونو"، و "بين الخلق آنا ديل حاقلاري" آذربايجانين ملي دمكراتيك حركاتينا تازه و گئنيش بير گوج و اولدوغو كيمي اينساني بير سيما وئرير. تورك ديلي ، حقيقتاً، آذربايجانين ملي دمكراتيك حركاتنين ايچ اوزه يي دير. بو باخيمدان بين الخلق آنا ديلي گونو هر بير ايراندا ياشايات توركه، اورك سؤزون هايقريرماقدير... بوگون آذربايجان هارايي هر كسه بللي دير؛ تورك ديلي رسمي اولسون....!


بؤلوم :


بؤلوم لر
     
یولداش لار
     
باغلانتی لار
یارپاق لار
سایغاج
  • ایندی بلاق دا :
  • بوتون گؤروش لر :
  • بو گونون گؤروشو :
  • دونه نین گؤروشو :
  • بو آیین گؤروشو :
  • باخیش لار :
  • یازی لار :
  • یئنیله مه چاغی :